أخـر المقالات

الجمعة، 13 نوفمبر 2015

الشخصيات التي تصادف الــ Sales وكيف ينجح في التعامل معها

-#-#


كتير من اللي شغالين في مجال الـ "Sales" بيستغربوا انهم ممكن يستخدموا وسيلة معينة للبيع و تبقى مجدية جدا مع عميل و ماتجيبش أي نتيجة مع عميل تاني ، بس مفيش حاجة تستدعي الاستغراب ، لأن العميل في الآخر هو انسان ، ليه طباع و طريقة تفكير بتختلف عن غيره .. و عشان تكون Salesman شاطر ، لازم تكون عارف نوعية الشخصيات اللي ممكن تصادفك ، و تقدر تحلل شخصياتهم من الجانب العقلاني و العاطفي :- 1- الشخصية الودودة: هي الشخصية اللي صاحبها بيبقى عاطفي أكثر منه عقلاني و بيتجاوب مع رسالتك البيعية بشكل كبير، لكن التعامل معاه مش سهل زي ما انت متصور ، لأن النوع ده بيبقى مذبذب و بيبقى هدفه انه يرضي كل اللي حواليه فـ من الممكن انه يعطل اتمام عملية البيع ، طب هتتعامل مع النوع ده ازاي؟؟ بإنك تبني علاقة مودة معاه و تحاول قدر الامكان انك تقلل من المؤثرات الخارجية اللي بتاثر على قرار الشراء عنده ، و ماتزهقش من المفاوضات معاه ، خلي نفسك طويل. 2- الشخصية التحليلية: و دي شخصية صاحبها بيبقى عقلاني جدا و غير متجاوب مع عمليات البيع ، و عشان تبيع أي شيء للشخصية دي فأنت لازم تديلهم قدر وافي و متكامل من المعلومات حوالين السلعة او المنتج بتاعك ، و لازم تكون فاهم كويس اوي خصائص السلعة دي و هتفيد العميل في إيه ؟ و تركز على نقاط القوة الخاصة بالمنتج أو الخدمة و تبقى بتملك الادلة اللي بتثبت صحة كلامك. 3- الشخصية الواثقة: ده نوع من الشخصيات غير العاطفية و بتقدّر جدا الوقت و المجهود ، و هي شخصية غاية في التركيز و بتدقق في التفاصيل ، و مابتقبلش أي شكل من اشكال الخطأ في إتمام الصفقة أو عملية البيع ، و عشان تتعامل مع الشخصية دي لازم تكون "سيد قرارك" و تديهم احساس بالثقة في النفس و انك مش محتاج اجراءات مطولة عشان تتمم عملية البيع. 4- الشخصية المنبسطة: و دي بتبقى شخصية حازمة و عاطفية و اجتماعية في نفس الوقت ، و تحب تكون مركز الاهتمام ن التعامل مع الشخصية دي سهل لأنها بتبقى شخصية اجتماعية و لطيفة ، بس مع ذلك هي بتاخد وقت كبير جدا في الاقناع بالمنتج أو الخدمة ، و عشان كده لازم تتعامل مع الشخصية دي بشكل خاص ، و تبقى صريح و مختصر و واضح في تقديمك للمنتج ، و تبعد عن الاطالة و الملل ، و خليك دايماً متحمس للمنتج و الفكرة اللي بتقدمها .
-#-# -#-#

0 تعليقات على " "