كل ماتريد معرفته عن ادارة الموارد البشريه الـ HR

بسم الله الرحمن الرحيم 
في الموضوع ده ان شاء الله هنتكلم عن تعريف
HR وتدرجه الوظيفي ومهامه الوظيفيه واهميته لدي المؤسسات

والمقال ده بقلم الدكتور / عبد الرحيم نادر  له جزيل الشكر

النهارده هنتكلم عن إدارة الموارد البشرية "HR"
وهناخد لفة بسيطة عنها كلها زى الوظائف واهميتها والمسميات الوظيفية وهكذا وبعد كده هنشرح كل حاجة فى كام بوست بالتفاصيل 😊

بس الاول لازم نعرف الفرق بين الـ "HRM" و الـ "HRD"
يعنى الفرق بين إدارة الموارد البشرية(Human Resource Management) وتنمية الموارد البشرية ( Human Resource Development )
لان البعض بيخلط بينهم لان هما الاتنين ليهم علاقة بالعنصر البشرى
طيب نبدأ نعرف بشكل سريع الراجل بتاع الـ HRD ده بيعمل ايه ؟
هو اللى بيساعد الناس او الموظفين انهم يطوروا مهاراتهم الشخصية والتركيز على الذات وبناء الشخصية وتحفيزهم وبيساعدهم فى ادارة الوقت ويعطيهم الحماس و بيركز على السلوكيات الخاصة بالبشر لان تنمية الموارد البشرية مرتبطة بعلم النفس و العلوم الانسانية .
طيب دلوقتى لما نلاقى حد بيتكلم فى تنمية المهارات الشخصية وادارة الوقت ويقولنا انا HR نعرف عطول انه مش فاهم فى المجال خالص لانه مش قادر يفرق بين مجال ادارة الموارد البشرية والتنمية البشرية وحتى مش عارف المسمى الصحيح لوظيفتة .. يبقى نصاب 😃 .. ونقوله انت HD مش HR 🙂
نرجع بقى لكلامنا 🙂
ركز معانا بقى عشان نبدأ فى الشغل التقيل 😃

اهمية ادارة الموارد البشرية فى اى منظمة ايه ؟
باختصار هى ادارة استراتيجية بتحقق اهداف ورؤية المنظمة
والـHR هو حلقة الوصل بين الموظفين والمنظمة .. يعنى ازاى
هو اللى بيضمن حصول الموظفين على حقوقهم من الشركة وفى نفس الوقت تنفيذ اهداف الشركة

عايزين نعرف هو الـHR فى اى شركة المفروض بيعمل ايه !!؟
او ايه وظائف ادارة الموارد البشرية ؟
1- التخطيط
2- التوظيف
3- تحليل الوظائف
4- الاختيار والتعيين
5- المقابلات
6- المرتبات
7- التدريب
8- تقييم الاداء
9- المزايا والتعويضات
10- الاجور والمرتبات
وهنعرف بالتفاصيل عن كل حاجة فى البوستات الجاية

طيب المسميات الوظيفية او انا لما اكون HR لما اترقى فى الشغل هبقى ايه 😃
اول ما هتبدأ الشغل لما تتخرج هتكون HR Coordinator / HR Assistant
بيعمل ايه بقى ده 😃 بيشارك فى التخطيط واعداد البرامج التنفيذية لادارة الموارد البشرية وينفذها وبيسجل جميع قرارات التعيين والفصل والاستقالات والاجازات وبيعمل كشوف الترقيات والمرتبات ومسئول عن حفظ ملفات العاملين وبيكتب تقارير التقييم السناوية ومسئول عن متابعة الحضور والانصراف والغياب للموظفين .

وبعد كده HR Specialist
وده بيكون متخصص فى وظيفة او اكثر زى التدريب او التوظيف او التقييم وممكن الـHR Specialist يتسمى باسم التخصص او المهمة اللى بيعملها زى :
- Recruiter وده بيكون مسئول عن الاختيار والتعيين
- Training & Development وده بيكون مسئول عن التدريب وتطوير مهارات العاملين
- Compensation and Benefits Specialist وده مسئول عن المزايا والتعويضات
- HRIS Specialist وده مسئول عن النظام المستخدم فى ادارة الموارد البشرية زى الـ SAP,Oracal

وبعدين Senior HR Specialist وده بيبقى بنفس اختصاصات الـ HR Specialist بس بيكون معاه صلاحيات اكتر لانه بيكون المدير المباشر ليهم

وبعد كده هتكون HR Supervisor وده مشرف موارد بشرية
هو اللى بيشرف على الـ Orientation و الـ applicant interviews و الـ Retirement Workshop والتواصل مع الادارات الاخرى بغرض تقديم المعلومات والمساعدة وبينسق عملية التوظيف وهو اللى بيقيم البرامج التدريبية 🙂

وبعد كده هتبقى HR Assistant Manager وده بقى مساعد مدير الـHR
ما شاء الله 😊

وربنا هينفخ فى صورتك 😃 وهتكون HR Manager وده مسئول عن عمل الوصف الوظيفى لكل الوظائف وبيتابع تقييم الاداء وبيعمل ميزانية الاجور وبيختار المقبولين فى الوظائف وبيتابع التطورات فى سوق العمل وبيشرف على برامج التدريب للموظفيين وهو المسئول عن كل الوظائف بقى بتاعه الاتش ار

و اللهم ما لاحسد هتترقى بعد كده وتبقى Senior HR Manager وده كبير مديرين الـHR

وبمجهودك وشطارتك هتبقى بإذن الله HR Director وده مدير ادارة الموارد البشرية
وبيشرف على الاتش ارجية اللى شغالين فى ادارة الموارد البشرية فى الشركة وبيقدم التوصيات لباقى الادارات وبيقييم وبيشارك فى تنمية مهارات الموظفيين

وهتوصل بقى لـ Vice President وده نائب رئيس الشركة
وده بقى ايه بيحضر اجتماعات مجلس الادارة واحنا لاء 🙂
وبيشرف على كل اللى احنا اتكلمنا عليهم دلوقتى عشان يضمن تطبيق سياسات الشركة وهو اللى بيشرف على وضع الميزانية 😃
تابع معاى ان شاء الله هنكمل ... دى البداية

تعليقات

المشاركات الشائعة من هذه المدونة

امتحان البنك الاهلي الجديد 2017 / 2018 English and IQ test

طريقة التقديم وامتحان بنك القاهره

مسابقة البنك الزراعي المصري 2018